SPURT ER:   Ég er með syprustré í potti úti í garði hjá mér (ca 1,50m). Nú skilst mér að þetta sé "skálaplanta" en vissi það ekki þegar ég keypti hana. Vandinn er sá að ég er ekki með neinn garðskála. Hvar er best að hafa plöntuna í vetur og hvernig umönnun þarf hún? Við hvaða hitastig líður henni best yfir veturinn? Leggst hún í dvala eða þarf hún vökvun ef ég tek hana inn?

 Sæl,

Sýprus er sígrænn og leggst þess vegna ekki í dvala yfir veturinn. Það er aðalmálið. Af því að plantan er virk allan veturinn þarf hún vatn og umönnun allt árið. Besti vetrarstaðurinn fyrir sýprus er garðskáli sem er lítið eða ekkert upphitaður yfir veturinn. Þar sem þú hefur ekki svoleiðis geturðu gert þrennt:

1. Haft sýprusinn inni; þá lifir hann oft langt fram eftir vetri. Þá má t.d. skreyta hann svipað og jólatré og kemur það mjög vel út. Reikna má með að það endi með því að hann þorni upp vegna heits og þurrs stofulofts hjá okkur þótt vel sé vökvað. Þegar sýprus er hafður inni þarf einmitt að passa að moldin þorni ekki alveg. Gott er að buna vatni yfir alla plöntuna af og til. Oftast er litið á hann sem ,,einnota” enda er verðið lágt.

2. Haft hann úti, t.d. við anddyrið í keri eða potti. Sýprus þolir svolítið frost en ef það er langvarandi getur farið illa af því að þá er barrið að vinna og reynir að draga vatn upp úr jarðveginum. Ef moldarklumpurinn er frosinn nær plantan engu vatni eða næringu upp og þess vegna endar oft með því að hún veslast upp, þornar og deyr. Þess vegna þarf að vökva í frosti, bæði jarðveginn og buna yfir barrið. Í mörgum tilfellum er hægt að færa pottinn inn eða í betra skjól þar sem minna frýs á meðan frostið gengur yfir. T.d. er allt í lagi að hafa hann í nokkra daga inni í bílskúr þótt birtan þar sé ekki mikil, á meðan frostveður líða hjá.

3. Ef þú hefur ekki áhuga á að hafa hann inni og hefur ekki skjólgott anddyri þá væri reynandi að geyma hann úti þar til næsta vor. Þá vökvarðu hann vel, leggur hann á hliðina í pottinum, kemur honum fyrir undir vegg þar sem lítið næðir um hann og breiðir vel yfir hann hvítum akrýldúk. Við lágt hitastig vinnur barrið minna og þegar potturinn liggur á hliðinni þá gufar rakinn mun seinna upp úr honum og þú þarft ekki alltaf að vera að vökva. Akrýldúkurinn veitir svo barrinu skjól fyrir þurranæðingi en hleypir samt birtu í gegnum sig. Ef þetta er gert þarf samt að fylgjast með plöntunni og vökva einstöku sinnum yfir veturinn.

Gangi þér vel,
Helga Hauksdóttir