Aðventublómin bjóða upp á marga möguleika, mest eru þau notuð í fallegum skálum eða pottum á borð eða úti í glugga. Síðustu árin hefur aukist að fólk noti þessar plöntur til að lífga upp á umhverfið við útidyrnar hjá sér í skammdeginu og fyrir jólin.

Nóvemberkaktus Schlumbergera blómstrar ár eftir ár og verður oft stór og mjög fallegur, alþakinn bleikum eða hvítum blómum. Hann nýtur sín vel á borði, í glugga og sérstaklega vel á blómasúlu nálægt glugga.
Nóvemberkaktus þarf miðlungsvökvun þegar hann er í blóma en minna á öðrum tímum. Eftir blómgun þarf hann að hvílast og minnka þarf vökvunina verulega. Hann þarf litla vökvun allan veturinn. Á vorin þarf að skipta um mold á honum og auka vökvunina. Hann vex mikið á sumrin og eftir vaxtartímabilið er vökvunin minnkuð aftur þar til blómknúppar fara að sjást. Auðveld og falleg planta.

Kóralkirsiber Solanum pseudocapsicum stendur lengi með berin og lengst ef haft er fremur kalt á henni. Berin eru fyrst fölgræn, dökkna svo og verða gul, þá appelsínulit og síðast rauð. Berin eru eitruð og þess vegna þarf að passa að hafa plöntuna þar sem börn ná ekki í hana.
Kóralkirsiber þarf ekki mjög mikla vökvun þegar plantan stendur með berin en má helst ekki skrælþorna. Eftir að berin detta af visnar laufið og plantan hvílist. Fyrir þolinmóða má alveg reyna að fá hana í blóm og ber aftur. Þegar vorar fær hún aftur blöð. Þá þarf hún nýja mold, svalan stað, hressilega vökvun og áburð reglulega. Ef heppnin er með koma blóm í maí-júní og ber að hausti sem standa mánuðum saman.
Mjög falleg aðventu- og jólaplanta.

Gaultheria procumbens er sígræn lyngplanta. Hún hefur stór, skærrauð ber sem standa lengi. Þessi ber eru æt þótt ekki sé mælt með að þau séu borðuð í miklu magni. Bragðefnin úr þeim voru áður notuð í tyggjóframleiðslu og í dag eru þau notuð sem kökuskraut. Mjög fallegt er að skreyta t.d. súkkulaðikökuna með lítilli grein og berjum af plöntunni. Hún þarf súran jarðveg og reglulega vökvun.
Ef Gaultheria er höfð sem stofuplanta stendur hún í einhverja mánuði en stofuloftið er of þurrt til að hún lifi af heilan vetur inni. Gaultherian má líka vera úti og þarf þá svipaða umhirðu og sýprus; mikla vökvun og vörn fyrir frosti

Sýprus Chamaecyparis er notaður bæði inni og úti um jól og aðventu. Hann er fallegur stakur, bæði óskreyttur og líka með slaufum eða litlum jólaseríum þegar nær dregur jólum. Litlir sýprusar eru mjög fallegir og jólalegir í samplöntunum og skiptir þá ekki máli hvort notað er með honum haustplöntur, jólastjarna eða sumarblóm. Samplantanir með sýprus eru mjög mikið notaðar í skálum inni í stofu og úti við útihurðir og innganga. Stærstu sýprusarnir eru oftast notaðir stakir í fallegum pottum, einn stakur eða báðum megin við útihurðir eða í litlum ,,grúppum".
Hvort sem sýprus er hafður inni eða úti við anddyrið þarf hann mikla vökvun og má aldrei þorna. Honum finnst líka gott að láta úða vatni yfir sig allan.

Jólastjarnan Euphorbia pulcherrima er löngu orðin stjarna jólanna. Hún er sígild og fer alltaf vel á borði eða í gluggakistu. Hún er fallega rauð eða hvít með dökkgrænum blöðum. Ýmsir bleikir litir hafa verið reyndir í gegnum árin og í ár eru tveir nýir bleikir litir; dökkbleikur og föl- svolítið út í laxa-bleikur. Mjög fallegir, báðir á aðventunni.
Það eru háblöðin sem eru svo áberandi og falleg á litinn í skammdeginu. Sjálf blómin eru pínulítil og gul í toppnum, efst á milli háblaðanna. Gott er að skoða litlu, gulu blómin til að áætla hvað stjarnan mun standa lengi. Ef þau eru óútsprungin á hún mánuði eftir en ef þau eru útsprungin gæti hún enst í einn til tvo mánuði en ekki mikið lengur. A.m.k. ekki við venjulegan stofuhita. Það fer alltaf eftir hitastiginu hversu vel rauðu (lituðu) háblöðin standa. Best standa þau á frekar svölum stað, um eða undir 16°C. Þannig geta þau staðið í marga mánuði. Vökvið jólastjörnuna oft og lítið í einu. Hún má alls ekki þorna og alls ekki standa í vatni. Notið ekki ískalt vatn og hún hefur gott af að standa á rökum vikri eða smásteinum svo að rakt loft leiki um hana.
Ef kalt er úti þegar jólastjarna er keypt er nauðsynlegt að verja hana á leiðinni heim. Þá er betra að fá hana innpakkaða í bréf heldur en í sellófan. Látið hana heldur ekki bíða úti í bíl á meðan farið er í lengri innkaupaferðir, farið beint heim með hana, þar sem hún fær jafnan hita. Kjörhiti fyrir jólastjörnu meðan hún er í blóma (litlu, gulu blómin) er 16-21°C.
Þeim sem vilja freista þess að halda lífi í jólastjörnunni áfram eftir jólin skal bent á að hún þarf svalan stað eftir blómgun, 12-16°C og góða birtu. Draga á þá verulega úr vökvuninni þangað til í apríl. Þá er henni umpottað, vöxturinn lagaður ef þarf og vökvun aukin. Ef hún á að blómstra aftur þarf að gera sérstakar ráðstafanir. Eftir vaxtartímabilið, í lok ágúst, þarf að stytta daginn niður fyrir 10 klst. T.d. má setja yfir hana svartan poka frá kl. 18:00 til kl. 07:00 dag hvern. Þá undirbýr hún blómgun og eftir nokkrar vikur fer að sjást litur í háblöðunum.