Ágúst er tími lilja og rósa. Nú er sumarið heldur betur farið að styttast í annan endann og prímadonnur garðsins keppast við að kreista út blóm áður en fyrsta frostið skellur á. Það er oft æsispennandi að sjá hvort það hefst. En það eru nú samt ekki bara prímadonnur sem blómstra í ágúst.

Liljurnar byrja margar að blómstra í byrjun ágúst. Asíublendingarnir eru hver öðrum glæsilegri og margir hverjir þrífast ljómandi vel á góðum stað. Þeir eiga það þó til að verða skammlífir. Nokkrar sortir sem hafa reynst vel eru 'Lollypop', 'Marrakech' og 'Lemon Stardust'.

Margar hávaxnar bláklukkutegundir blómstra í ágúst, þeirra á meðal fagurklukkan sem ber svo sannarlega nafn með rentu. Það er leitun að eins glæsilegri plöntu. Aðrar fallegar bláklukkur sem blómstra núna eru risaklukka, mjólkurklukka og kóreuklukka sem blómstrar í lok ágúst og stendur í blóma fram í september.

Murur eru líka áberandi í ágúst. Sú glæsilegasta er blendingsmuran, oft nefnd rósamura, með sín stóru fylltu blóm. Blóðmura blómstrar líka um þetta leiti og hefur yrkið 'Melton Fire' reynst ljómandi vel.

Beðrósirnar, prímadonnurnar í garðinum, standa nú margar í blóma. Þær fengu plastskýli hjá mér í vor til að hjálpa þeim af stað og getur munað hátt í mánuði á blómguninni með því móti. Sem þýðir að þær ná flestar að blómstra eitthvað áður en sumarið líður hjá. Margar eru jafnvel búnar að blómstra eins og 'Duftwolke', 'Masquerade' og dornrósin. Nokkur falleg yrki sem standa í blóma núna eru 'Schneewittchen', 'Menja' og 'Europeana' er nálægt því að opna fyrstu blómin. En það eru ekki bara prímadonnur í blóma núna, margar runnarósir standa enn í blóma síðan í júlí eins og t.d. ígulrósayrki og bjarmarósir. Ígulrósin 'F.J.Grootendorst' er með síðustu ígulrósunum að byrja að blómstra og er nú þakin blómum og klifurrósirnar 'Flammentanz', hunangsrós og pólstjarnan skarta sínu fegursta.

Aðrar plöntur sem eru áberandi í ágúst eru riddarasporar, moskusrós, doppugullrunni og fyrstu vendirnir eru að byrja að opna sín yndislega fallegu bláu blóm. Furðuvöndurinn er fyrstur og bætast fleiri við þegar líður á haustið.

Rannveig Guðleifsdóttir

Garðaflóra