Ræktun sumarblóma

23.01 2011

Sáning sumarblóma er eitt af vorverkunum. Reikna má með 4-8 vikum þar til hægt er að planta út á vaxtarstað. Samt eru til nokkrar harðgerar, fljótvaxnar tegundir, sem hægt er að sá beint út á vaxtarstað í maí, ef aðstæður leyfa. Aftan á fræpökkunum eru upplýsingar ef meðhöndla þarf fræið sérstaklega.

Ef sáð er í bakka eða potta er handhægast að nota til þess gerða sáðmold, þar sem hún hefur rétta samsetningu og á að vera laus við sjúkdóma og meindýr.  Athugið að þvo vel úr heitu vatni öll áhold og potta sem nota skal fyrir sáningu, sérstaklega ef þau hafa verið notuð áður – það borgar sig að eyða eðeins meiri tíma til að fá upp heilbrigðar plöntur.

Annar möguleiki er að nota sáðtöflurnar jiffy 7, sem eru samanþjöppuð svarðmold, sem þrútnar út í vatni og myndar nokkurs konar moldarpott með neti utan um.  Fræið er sett beint í pottinn sem er með næringu sem dugar fyrstu 3 virkurnar.  Ræturnar vaxa gegnum netið og má síðan setja pottinn beint í stærri pott með gróðurmold þegar þar að kemur.

Annars er algengasta aðferðin að hella 6-7 cm þykku lagi af sáðmold í bakka og þjappa síðan létt yfir þannig að yfirborðið sé slétt.  Moldin er vökvuð þannig að hún verði vel rök, en ekki blaut.  Fræinu stráð yfir og síðan hulið með léttri moldinni.  Þumarfingursregla er að moldarlagið sé tvisvar sinnum þykkara en fræið sjálft.  Mjög fingert fræ eins og brúðarauga, tóbakshorn og ljónsmunna er ekki hulið.

Munið að merkja bakkan vel með nafni plöntunnar, sort blóma og lit og athugið að halda moldinni mátulega rakri meðan á spírun stendur.  Gott er setja plast yfir bakkann og síðan dagblað þar yfir.  Flest fræ spíra best á skuggsælum hlýjum stað (góður spírunarhiti er 18-20°C). en athugið að fylgjast vel með spíruninni.

Um leið og fyrstu kímblöðin koma í ljós er tekið ofan af bökkunum  og þá þurfa plönturnar að fá sem mesta birtu og loft.  Athugið að jafnvægi þarf að vera milli birtu og hita.  Ef birtan er og lítil miðað við hita verður plantan teygð og veikluleg.

Þegar kímplönturnar fara að skipta blöðum er rétt að dreifplanta.  Þá eru plönturnar gróðursettar í góða gróðurmold í pottum eða bökkum.   Hæfilegt vaxtarrými fyrst er 6x6 cm fyrir flestar plöntur.  Góð birta er nauðsynleg og athugið að flestar plöntur verða fallegastar ef þær eru gróðursettar við fremur lágt hitastig.  Passið að gleyma ekki að vökva en athugið að fara mjög varlega í áburðargjöf ef þið notið tilbúna gróðurmold því hún á að innihalda öll næringarefni í réttum hlutföllum og hætta er á skemdum á viðkvæumum ungplöntum, ef þær fá of mikið af áburði.

Ef allt hefur gengið vel má síðan planta í beð um mánaðarmótin maí-júni eftir því sem veður leyfir en athugið að gott er að herða plönturnar áður, t.d. með því að setja bakkana eða pottanan út á daginn og inn aftur á kvöldin í nokkra daga svo vöxturinn haldi eðlilegum hraða.

prentvæn útgáfa 


29.03.2012

Trjáklippingar

05.04.2011

Matjurtir

14.10.2011

Nóvemberkaktus


31 - 8 af 8
1 





Leita